सुर्खेत, ३ कार्तिक । मालपोत कार्यालय दैलेख परिसमा घुस रकम लिने दुई जनालाई अख्तियारको टोलीले रंगेहात पक्राउ गरेको छ ।
सेवाग्राहीबाट बारम्बार घुस माग्ने दुई जनालाई अख्तियार दुरुपयोग अनुसन्धान आयोग सुर्खेतको टोलीले सोमबार पक्राउ गरेको हो ।
सेवाग्राहीको उजूरीको आधारमा उनीहरुलाई पक्राउ गरेपनि नाम भने खुलिनसकेको अख्तियार दुरुपयोग अनुसन्धान आयोग सुर्खेतका सूचना अधकिारी मेघनाथ सापकोटाले जानकारी दिए ।
उनीहरुलाइ सोमबार साँझ सवा पाँच बजे नियन्त्रणमा लिएको सापकोटाको भनाई छ । ‘दुई जनालाई घेरा हालेर नियन्त्रणमा लिएको हो’ सापकोटाले भने, ‘घुस रकम र पक्राउ पर्नेहरु कर्मचारी मात्रै हुन् वा दलाल पनि हुन भन्ने केही खुलेको छैन् ।’
टोलीले मुचुल्का उठाइरहेकाले केही बेरमा घटनाको विस्तृत विवरण सार्वजनिक गरिने सापकोटाले जानकारी दिए ।