सुर्खेत । कर्णाली प्रदेशका १० जिल्लाका १४ वटा हिरासतमा पुस्तकालय स्थापना गरिने भएको छ । कर्णाली प्रदेश प्रहरी कार्यालय सुर्खेतले सुरू गरेको ‘कारागारलाई किताब’ अभियान अन्तर्गत १० जिल्लाका जिल्ला प्रहरी कार्यालयसहित १४ वटा मुद्दा चल्ने प्रहरी कार्यालयमा १५ दिनभित्रमा पुस्तकालय स्थापना गर्न लागिएको हो ।
कर्णाली प्रदेश प्रहरी कार्यालयका प्रमुख प्रहरी नायव महानिरीक्षक भिमप्र्रसाद ढकालले १५ दिनभित्र हरेक प्रहरी हिरासतमा पुस्तकालय स्थापनाका लागि परिपत्र जारि गरिएको बताए । विभिन्न अपराधिक क्रियाकलापमा संलग्न भएको आरोपमा पक्राउ परेका व्यक्तिहरुमा सकारात्मक सोचको विकास गर्ने उद्दश्यका साथ हिरासतमा पनि पुस्तकालय स्थापना गर्न लागिएको ढकालले बताए ।
पुस्तकालयमा विभिन्न व्यक्तिका जीवन संघर्ष, साहित्य, कथा, कविता, जेल जीवन, राजनीतिक विचार, सिद्धान्त, व्यवसायिक सीप, उत्प्रेरणा, सकरात्मक सोचका विषयमा लेखिएका पुस्तकहरु रहने ढकालको भनाई छ । विहीबार प्रदेश प्रहरी कार्यालयमा पत्रकारहरुसँग कुरा गर्दै प्रहरी प्रमुख ढकालले कारागार पुस्तकालयबाट प्रभावित भएर हिरासतमा पुस्तकालय स्थापना गर्न लागेको बताए ।
अभियानलाई प्रभावकारी बनाउन सञ्चारकर्मी, नागारिक समाज, सरकारी तथा गैर सरकारी संघसंस्थाको अहम भुमिका रहने उल्लेख गर्दै पुस्तकालयका लागि आवश्यक पर्ने पुस्तकहरु संकलनमा सबैको हातेमालोको अपेक्षा गरेको उनको भनाई थियो ।
कारागार पुस्तक अभियान २३ चैत्र २०७५ मा साहित्यकारसमेत रहेका तत्कालिन प्रहरी नायव महानिरीक्षक महेशविक्रम शाहको संयोजकत्वमा सुरु भएको थियो ।
